नेपालको शेयर बजार परिसूचक नेप्से लगातार चौथो कारोबार दिनमा पनि वृद्धि भएको छ। आज नेप्से ९ दशमलव ६१ अङ्कले बढेर २ हजार ६ सय ६५ दशमलव ६० विन्दुमा पुगेको छ। यसक्रममा कारोबार रकममा पनि उल्लेख्य सुधार आएको छ; हिजो ५ अर्ब ८२ करोडको कारोबार भएकोमा आज ३ सय २२ वटा कम्पनीको १ करोड ३६ लाख कित्ता शेयर ६ अर्ब ६९ करोड रुपैयाँमा किनबेच भएको छ।

आज फाइनान्स, लगानी, बीमा र म्युचुअल फन्ड बाहेक अधिकांश समूहको शेयरमा वृद्धि भएको छ। बजारमा १ सय ४२ वटा कम्पनीको शेयर बढ्दा १ सय ४ वटाको घटेको छ। आज झापा इनर्जी, सागर डिस्टिलरी, स्वस्तिक लघुवित्त र श्रीनगर एग्रिटेक इन्डस्ट्रिज कम्पनी को शेयर मूल्य १० प्रतिशतले बढेको छ। यद्यपि, बजार बढेको दिन पनि बोटलर्स नेपाल (बालाजु) कम्पनीको शेयर भने सबैभन्दा धेरै ३ दशमलव ९४ प्रतिशतले घटेको छ।