आईसीसी विश्वकप क्रिकेट लिग–टू अन्तर्गत दुबईमा जारी त्रिदेशीय सिरिजको अन्तिम खेलमा नेपालले यूएईलाई २४० रनको लक्ष्य दिएको छ।

टस हारेर पहिला ब्याटिङ गरेको नेपालले निर्धारित ५० ओभरमा ९ विकेट गुमाउँदै २३९ रनको योगफल तयार पार्‍यो। नेपालका भीम सार्कीले ४८ रन र कुशल मल्लले ४५ रनको योगदान दिए। यूएईका बलरहरू जुनैद सिद्दिकी, मुहम्मद जावदुल्लाह र ध्रुव पराशरले समान २–२ विकेट लिए।

यो खेल सिरिजको अन्तिम मुकाबला हो, जसमा घरेलु टोली यूएई, नेपाल र अमेरिका सहभागी छन्। आजको खेलपछि नेपाली टोली स्वदेश फर्कनेछ।

यसअघि नेपालले अमेरिकासँग खेलेका दुवै खेलमा हार बेहोरेको थियो — पहिलो खेलमा १०६ रनले र दोस्रो खेलमा ४ विकेटले। यस्तै, यूएईविरुद्धको पहिलो खेलमा पनि नेपाल ५ विकेटले पराजित भएको थियो।

अहिले नेपाल १९ खेलमा १२ अंकसहित लिग तालिकाको सातौं स्थानमा रहेको छ। अमेरिका २४ खेलमा ३६ अंकसहित शीर्ष स्थानमा छ भने यूएई १९ खेलमा ८ अंकका साथ पुछारमा रहेको छ।