संयुक्त राज्य अमेरिकाले भेनेजुएलाका राष्ट्रपति निकोलस मादुरोलाई पक्राउ गर्न सहयोग गर्न जानकारी दिने व्यक्तिलाई दिने पुरस्कार रकम दोब्बर गरी ५० मिलियन अमेरिकी डलर (अर्थात् ६६ अर्ब नेपाली रुपैयाँभन्दा बढी) पुर्‍याएको छ।

यसअघि यो रकम २५ मिलियन डलर थियो। अमेरिकी महान्यायाधिवक्ता पाम बोन्डी (Pam Bondi) ले यो घोषणा गर्दै मादुरोलाई "विश्वकै सबैभन्दा ठूलो लागूऔषध तस्करहरूमध्ये एक" तथा "राष्ट्र सुरक्षा का प्रमुख खतराहरूमध्ये एक" भएको गम्भीर आरोप लगाएकी छिन्। उनका अनुसार मादुरोले हिंसात्मक लागूऔषध नेटवर्कहरू — Tren de Aragua, Sinaloa Cartel, र Cártel de los Soles — सँग मिलेर अमेरिकामा फेन्टाइलिन लगायतका घातक पदार्थको तस्करीमा संलग्नता देखाएका छन्। अमेरिकी प्रशासनद्वारा सार्वजनिक गरिएको आधिकारिक भिडियोमा ७०० मिलियन डलरभन्दा बढी सम्पत्ति जफत गरिएको तथा करिब ७ टन लागूऔषध मादुरोसँग सम्बन्धित रहेको दाबी गरिएको छ। तर, भेनेजुएलाको प्रतिवाद पनि उत्तिकै तीव्र छ।

विदेशमन्त्री इवान गिल (Yvan Gil) ले अमेरिकाको यो घोषणा "सबैभन्दा हास्यास्पद धुँवा धोलो" तथा "राजनीतिक प्रचारप्रसार (प्रोपगान्डा)" मात्र भएको बताएका छन्। यसअघि, सन् २०२० मा मादुरोलाई पहिलोपटक १५ मिलियन डलरको इनाममा सूचीबद्ध गरिएको थियो। जनवरी २०२५ मा मादुरो तेस्रो कार्यकालमा निर्वाचित भएपछि बाइडेन प्रशासनले पुरस्कार रकम २५ मिलियन डलर बनाएको थियो।

हालको यो निर्णय अमेरिका र भेनेजुएलाबीच जारी रहेको राजनीतिक तथा कूटनीतिक तनावलाई झनै चर्काउने अर्को कदमका रूपमा लिइएको छ। यसले दुई देशबीचको सम्बन्धमा थप तनाव सिर्जना गर्ने संकेत दिएको छ।