आगामी प्रतिनिधिसभा सदस्य चुनावका लागि समानुपातिक निर्वाचन प्रणालीतर्फको कार्यक्रम यही मङ्सिर २० गतेदेखि सञ्चालन गरिने भएको छ। निर्वाचन आयोगले अस्ति आइतबारदेखि नै आयोगको कान्तिपथ कार्यालयमा समानुपातिक निर्वाचन प्रणालीतर्फको निर्वाचन अधिकृतको कार्यालय स्थापना गरी तयारी सुरु गरिसकेको छ।

निर्वाचन आयोगद्वारा स्वीकृत कार्यक्रम तालिका:

• राजनीतिक दलले निवेदन पेस गर्ने: मङ्सिर २१ गते बिहान १० बजेदेखि २३ गते दिउँसो ४ बजेसम्म

• निवेदन पेस गर्ने दलको नामावली प्रकाशन: मङ्सिर २४ गते बिहान १० देखि दिउँसो ४ बजेसम्म

• उम्मेद्वारको बन्दसूची पेस गर्ने: पुस १३ र १४ गते

• उम्मेद्वारको बन्द सूची अन्तिम प्रकाशन: माघ २० गते

निर्वाचन आयोगले समानुपातिकतर्फको निर्वाचन अधिकृतको रूपमा आयोगका सचिव महादेव पन्थ र सहायक निर्वाचन अधिकृतका रूपमा सहसचिव यज्ञप्रसाद भट्टराईलाई जिम्मेवारी तोकेको छ। समानुपातिक निर्वाचन व्यवस्थापनका लागि कुल ४१ कर्मचारी खटिने आयोगले जनाएको छ।

विद्यमान कानुन अनुसार प्रतिनिधिसभामा २ सय ७५ सदस्यमध्ये १ सय ६५ सदस्यको चयन प्रत्यक्ष निर्वाचन प्रणाली र बाँकी १ सय १० सदस्यको चयन समानुपातिक प्रतिनिधित्व प्रणालीद्वारा गरिनेछ।